Je moe ze hoed kriehe
STREEKTAAL Soms vraehe kennissen me wè es oe of ’t zit mee mien biljarten en dat van de Meliskerkse soos. Dirom dan noe een kleine ‘update’ over ons ‘level’( twi dialectwoorden van ons kleinhuus..) en wat randzâken van de soos!
Tekst Frans van der Heijde PZC 12-11-19
Over m’n eihen kan ‘k bepaeld hin lovende woorden spreke/schrieve. Eêl soms ebb’ik het idee da’k een bitje veropperd bin bie dit spil. Mè nog vôdat die gedachte wortel kan schiete in m’n geêst, liekt het of aole bôze biljartgeêsten tegen me saemenspanne en de drie ballen op het groene laeken d’r aordigheid in ebbe raekelings langs mekaore ene te rollen, onderwiele dat ik ze mee mien biljartstok gecommandeerd ao om mekaore te raeken. Nae wi zô’n partij uut de serie ‘Brulle mee de musse op!’, besef ik aolmè meer dat de voetbal en de tennisbal vroeger vee beter luusterde nè wat ik wou, dan die witte of gele biljartballen. Soms hae ‘k naebie dienke dat het an m’n eihen leit…!
Biljartbril
Gelukkig is en bluuft gedeêlde smart alve smart en mohe me in de koffie-, thee-, bier-, en borrelpauze bie de soos van andere senior-strijders ore, dat het ‘net-nie’ ook bie ulder opkomt as een regenbuu nae een prachtige en zunnige dag. Eigenlijk zouwe me d’r wat an wille doe, wan me bin tot de conclusie gekomme dat het an de ballen leit. Die bin te klein vô mensen van onze leeftied. Ook â schaf je een biljartbril an, ze bluve mekaore passere mee een ‘vloeitje’ ruumte! Dirom pleite me vô wat hrôtere ballen (een paer millimeter in doorsnee is â genoeg ). Dan bin aol die ballen ‘goed’ die je noe de nôdige ergernisse heve..! En dan kunne me nie mi de ballen de schuld geve. Alleên nog mè ons eihen of een te kouwe biljarttaefel wi een bal nie goed op kan rolle..! Wan iemand of ies moet toch de schuld kriehe!
Genderneutraâl
Bluuft vô mien nog het probleem van het feit, dâ me alleên mè mee mannen biljarte. En dat in een tied, dâ ze aole spilletjes en spellen genderneutraâl wille ebbe. De vrouwen bin iedere keer an ’t rummicubben in een zaâltje nest ons en di doet dan wi hin ienkele man an mee. Oe kriehe me noe de vrouwen achter de ‘keu’en de groene taefel bie onze soos? Ze ebbe â verscheiene uutnôdigingen afgeslohe wan ze voele d’r eihen beter achter de plankjes met blokjes. Ik belove, dât er ooit wè es wat mannen mee komme spele, as ulder de moed op kunne brienge ons spil beter te lere kennen. Ik dienke dat het nòg gezelliger is as er gemengd gespeeld oordt â zâ’t wè even wenne weze. Pas vroeg ik nog oe of ’t hieng bie de spelende dames. ,,Je moe ze ( de blokjes..) eest goed kriehe”, reageerde d’r éên mee een dienk-rimpel op d’r vooroôd. Nou, as dat zô is, dan is’t net biljarten!!