STREEKTAAL
In naebie aole durpen in Zeêland ebbe ze een soos vô senioren. Wat is het dan jammer, dat er nog zôvee mensen eênzaem bin en bluve. Je kan makkelijk lid ore en vô ’t geld oef je het nie te laeten, wan de contributie is nog vóór-oorlogs. En meêstal kent de gezelligheid hin tied bie zulke groepjes ouwere. Nie alleên spilletjes doen is belangriek, de onderlinge contacten bin dikkels eêl levendig en leerzaem. Ik kan ’t wete, wan ik bin, hoewel hlad nie eênzaem, hraog bie de soos van ‘Melismoskou’ wi zô’n vuuftien mannen, in het naejaer of de vroege winter van ulder leven, iedere keer wi d’r best doe rond de biljarttaefel en vrouwen uut hetzelfde tiedperk aolerlei spilletjes doe.
Tekst Frans van der Heijde PZC 02-03-20
De pauze brienge me saemen deu, â is ‘saemen’ een hroôt woord. M’ebbe onze eihen taefel en de schaepen bin gescheie van de bokken! Het is aoltied wi een interessante tied, wan onder de koffie komme vele onderwerpen an bod. Om te beginnen onze en andermans kwaelen! Pas is de ‘staâroperatie’ uutgebreid an bod geweest. Diepgaende discussies over ‘nae-staâr’ wiere beslôte mee een totaâl nieuwe definitie: ‘Nae-staer is het naestaeren van een ouwe man nè een joenge meid’...! Jae, senioren kunne nog goed uut d’n oek komme!
Erregens staet er zwart op wit dâ me beter nie kunne praote, laet stae discusere, over godsdienst en pollitiek. Toch oordt mee name de landelijke pollitiek van aole kanten belicht, beoordeêld en ook wè veroordeêld. Het is nie te hloven oevee deskundige d’r in onze herfst-winter collectie zitte. Het is hlad hin gek idee om uut ons gezelschap een volledige ministerploeg te kiezen. Ik kan, mag en wille natuurlijk hin naemen noeme mè, afgaende op aole adviezen in de pauze ,kan ik julder verzekere, dâ me een zegen vô Nederland zouwe weze! Noe â ore, tussen twi kommen koffie deu, de hroôtste pollitieke zurgen opgelost…! En me ebbe een breêd anbod . Butenlanse zâken? Land- en tuunbouw? Financiën? Onderwies? Sociâle zâken? Andel en scheepvaert? Zô gek kao je het nie bedienke, me ebbe ’t aol in ‘Ons uus’ En me zulle nie schrome om ook de vrouwen d’r bie te vraehen. Wan as je bie rummicubben vee inzicht eit….?
Van een goeie kiek op de menselijke verhoudingen getuugt de opmerking van een nie bie naeme te noemen speler dâ biljartballen vee op vrouwen liekene: Ze doen hlad nie aoltied wat â jie wil! Ie voegde d’r wè an toe dat’n het nie persé over z’n eihen vrouwe ao! Zelf ao’k nooit an zô’n vergelieking gedocht mè nae lang dienken kon ‘k er zelfs wat an toevoege. Je moe ze nooit ard anpakke, liever strele! Ze verrasse soms angenaem, mè soms..! As er ies mis gaet, leidt het nooit an ulder en d’r op moppere elpt nie. Regelmaetig oppoese wè! Het gaet in dit geval ook nie persé over mien eihen vrouwe..!
De soos... goed en leerzaem!